美麗灣開發案概略整理

Youtube 影片連結（高畫質,Tâi-gí Lô-má-jī jī-bōo、華語字幕）

整理／姚惠耀、洪國峰
配音、後製／洪國峰

抗議民眾：「違法環評，立即解散！」

012年12月22，馬雅曆法循環重生的日子，台東縣政府內場外場煞抗議聲不斷，當咧舉行的，就是美麗灣度假村的環境評估會議，關心美麗灣開發案的學生衝入去會議的現場，佮警方爆發衝突。是為啥物這的學生對這個開發案遐爾仔不滿咧？咱會使由文化、法治、環保三方面來看。

成大學生李品涵：「有許多支持美麗灣開發的台東縣民，我為他們感到開心，因為他們得到他們想要的，但我更為他們難過，因為他們不知道他們失去的是什麼。」

美麗灣開發的這塊地是杉原灣，伊原本的名Fudafudak，是阿美族「美麗的沙」的意思。成大原住民文化交流社前社長李品涵講，這原底是阿美族刺桐部落傳統的生活區域，煞因為美麗灣的開發，有可能被強迫改變生活的型態。這的影響是無法度用都市的、單一的觀點來去評估的。

李品涵：「這塊土地是阿美族人他們去擷取生活所需都必須使用到的一塊土地。部落其實是緊鄰著飯店的，那等到大批的遊客進到這片海灘以後，過去族人在海邊進行比如說捕魚的工作、比如說海祭，海岸的阿美族他們跟海有很密切的關係，那這些東西勢必會受到改變。」

2003年美麗灣業者佮台東縣政府簽訂50年的BOT契約，按算欲開發6公頃的國際渡假村，猶毋過隔年初，干焦以免做環評的0.9997公頃來做開發，業者提著建照了後，2006年拍算欲申請擴大開發的規模到6公頃，後來去予環保團體掠包，環保團體對1公頃和6公頃的土地，提出停工、撤銷環評的訴訟，環保署認定業者是規避環評、建照無效。

2010年高等行政法院判決建照佮環評無效。2012年1月，上懸（最高）行政法院判決環評無效，9月判決開發違法，要求台東縣政府命令美麗灣度假村公司停止開發，全案定讞，環保團體會當講是一路勝訴，怹認為講，佇法理上，最高行政法院判決美麗灣環評無效定讞，建照嘛無效啊，美麗灣應該是違建，愛馬上拆除。

2012年11月東部有70外位教授，號召全國的學者徛出來，作伙簽署美麗灣全國學術界聲明，捍衛環評程序正義佮法治尊嚴，無到一禮拜就有600外位學者參與簽署，怹認為講，若會當予環評違法的開發案來就地合法，毋但是台灣東部的危機，閣較是台灣整體國土的危機。

東華大學自然資源與環境學系副教授戴興盛：「美麗灣是實質違建，但是台東縣政府於建製的公文當中，皆不願意承認違建，而且拒絕拆除，中央各部會則互踢皮球，繼續坐視台東縣政府扭曲法令。」

政大公共行政系副教授杜文苓：「我們的行政機關好像變成是一個脫韁野馬，他不用接受行政法院判決的拘束，在這樣環評無效的情況之下，不斷的在跟行政法院的判決抗爭。」

藝人張懸：「美麗灣這個飯店的開發案是所有台灣各地的BOT都有可能會面臨的一個問題，就是政府沒有把關。」

2012年12月22日，台東縣召開第七擺環評，欲予美麗灣補環評，就地合法，環保人士是非常的不滿。

地球公民基金會執行長李根政：「各位想一想環評法通過的時候，第一條就寫著，為了要預防跟減輕對環境的影響，一個建物都已經蓋好，還要進行環評，這個哪來的預防跟減輕呢？」

支持美麗灣民眾：「台東要前進！支持美麗灣！」

支持美麗灣的在地民眾敢若是將這環境評估會議當做就業機會評估會議，怹認為講，外地人不應該插手台東的發展，希望美麗灣BOT的成功案例會當予閣較濟的財團轉來投資台東，帶起台東的觀光發展，予台東的子弟有機會留佇故鄉食頭路。

當地居民蔡文勝：「我當然會想念我的孩子，希望在台東這裡工作就好了。」

經過雙方討論了後，環評主席黃明恩帶著八名委員到二樓開密室會議，毋但無予民眾來監督，連媒體攏予擋佇咧門外。

記者：「你們警察依法行政，你現在擋我們全部記者，還我新聞自由！還我新聞自由！」

幾分鐘了後，環評委員公布最後的決定就是「有條件通過」美麗灣開發案，猶毋過監督機制和履行承諾事項，煞是一片空白。

律師許嘉容：「這三位（任職縣府的）環評委員應該要迴避，應迴避而未迴避，我們認為程序整個是違法的。」

美麗灣雖然佇紛紛擾擾的環評會議中有條件通過開發，猶毋過環保團體表示，怹紲落去閣會有其他的行動，絕對是無欲佮美麗灣來妥協。

Tâi-gí Lô-má-jī

Tsíng-lí: Iâu Huī-iāu, Âng Kok-hong
Phuè-im, tsián-tsi̍p: Âng Kok-hong

Khòng-gī bîn-tsiòng: “Uî-huat khuân-phîng, má-siōng kái-sàn!”

2012 nî 12 gue̍h 22, Maya li̍k-huat sûn-khuân tiông-sing ê ji̍t-tsí, Tâi-tang kuān-tsìng-hú lāi-tiûnn guā-tiûnn suah khòng-gī-siann put-tuān, tng-teh kú-hîng ê, tō sī Bí-lē-uan tōo-ká-tshun ê khuân-kíng phîng-kóo huē-gī, kuan-sim Bí-lē-uan khai-huat-àn ê ha̍k-sing tshiong-ji̍p-khì huē-gī ê hiān-tiûnn, kah kíng-hong po̍k-huat tshiong-tu̍t. Sī uī-siánn-mih jia ê ha̍k-sing tuì tsit-ê khai-huat-àn hiah-nī-á put-buán leh? Lán ē-sái iû bûn-huà huat-tī khuân-pó 3 hong-bīn lâi khuànn.

Sîng-tāi ha̍k-sing Lí Phín-hâm: “Ū tsin-tsè tsi-tshî Bí-lē-uan ê Tâi-tang kuān-bîn, guá uī in kám-kak huann-hí, in-uī in tit-tio̍h in siūnn beh tit-tio̍h ê, tān-sī guá kìng-ka uī in kám-kak kan-khóo, in-uī in m̄ tsai-iánn in sit-khì ê sī siánn-mih.”

Bí-lē-uan khai-huat ê tsit-tè tē sī Sam-guân-uan, i guân-pún ê miâ “Fudafudak” sī Amis “bí-lē ê sua” ê ì-sù. Sîng-tāi guân-tsū-bîn bûn-huà kau-liû siā tsîng siā-tiúnn Lí Phín-hâm kóng, jia guân-té sī Amis Tshì-tông pōo-lo̍k thuân-thóng ê sing-ua̍h khu-i̍k, suah in-uī Bí-lē-uan ê khai-huat, ū-khó-lîng pī kiông-pik kái-piàn sing-ua̍h ê hîng-thài. Jia ê íng-hióng sī bô-huat-tōo iōng tan-it ê too-tshī ê kuan-tiám lâi khì phîng-kóo ê.

Lí Phín-hâm: “Tsit-tè thóo-tē sī Amis in sing-ua̍h sóo su-iàu ê tsi̍t-tè thóo-tē. Pōo-lo̍k kî-si̍t sī kah pn̄g-tiàm sio-uá ê, tsē-tsē ê iû-kheh lâi-kàu tsit-phìnn hái-thuann liáu-āu, kuè-khì tso̍k-jîn tī hái-pinn tsìn-hîng pí-jû kóng lia̍h-hî ê kang-tsok, pí-jû kóng hái- tsè, hái-huānn ê Amis in kah hái ū tsin bi̍t-tshiat ê kuan-hē, jia ê mn̍gh-kiānn it-tīng ē siū kái-piàn.”

2003 nî, Bí-lē-uan gia̍p-tsiá kah Tâi-tang kuān-tsìng-hú tshiam-tīng 50 nî ê BOT khè-iok, àn-sǹg beh khai-huat 6 kong-khíng ê kok-tsè tōo-ká-tshun, iáu-m̄-koh keh-nî-tshe, kan-tann í bián tsò khuân-phîng ê 0.9997 kong-khíng lâi tsò khai-huat, gia̍p-tsiá thê-tio̍h kiàn-tsiàu liáu-āu, 2006 nî phah-sǹg beh sin-tshíng khok-tāi khai-huat ê kui-bôo kàu 6 kong-khíng, āu--lâi khì hōo khuân-pó thuân-thé lia̍h-pau, khuân-pó thuân-thé tuì 1 kong-khíng kah 6 kong-khíng ê thóo-tē, thê-tshut thîng-kang thiat-siau khuân-phîng ê sòo-siōng, khuân-pó-sú jīn-tīng gia̍p-tsiá sī kui-phiah khuân-phîng kiàn-tsiàu bô-hāu. 2010 nî, ko-tíng hîng-tsìng huat-īnn phuànn-kuat kiàn-tsiàu kah khuân-phîng bô-hāu. 2012 nî 1 gue̍h, siōng-kuân hîng-tsìng huat-īnn phuànn-kuat khuân-phîng bô-hāu, 9 gue̍h phuànn-kuat khai-huat uî-huat, iau-kiû Tâi-tang kuān-tsìng-hú bīng-līng Bí-lē-uan tōo-ká-tshun kong-si thîng-tsí khai-huat, tsuân-àn tīng-hiān, khuân-pó thuân-thé ē-tàng kóng sī it-lōo sìng-sòo, in jīn-uî kóng, tī huat-lí siōng, siōng-kuân hîng-tsìng huat-īnn phuànn-kuat Bí-lē-uan khuân-phîng bô-hāu tīng-hiān, kiàn-tsiàu mā bô-hāu ah, Bí-lē-uan ing-kai sī uî-kiàn, ài má-siōng thiah-tû.

2012 nî 11 gue̍h tang-pōo ū 70 guā uī kàu-siū, hō-tsiau tsuân-kok ê ha̍k-tsiá khiā tshut-lâi, tsò-hué tshiam-sú Bí-lē-uan tsuân-kok ha̍k-su̍t-kài sing-bîng, hàn-uī khuân-phîng thîng-sū tsìng-gī kah huat-tī tsun-giâm, bô-kàu tsi̍t-lé-pài tō ū 600 guā uī ha̍k-tsiá tsham-ú tshiam-sú, in jīn-uî kóng, nā ē-tàng hōo khuân-phîng uî-huat ê khai-huat-àn lâi tsiū-tē ha̍p-huat, m̄-nā sī Tâi-uân tang-pōo ê uî-ki，koh-khah sī Tâi-uân tsíng-thé kok-thóo ê uî-ki.

Tong-huâ tāi-ha̍k tsū-jiân tsu-guân kah khuân-kíng ha̍k-hē hù-kàu-siū Tè Hing-sīng: “Bí-lē-uansī si̍t-tsè siōng tō sī uî-kiàn, m̄-koh Tâi-tang kuān-tsìng-hú tī kiàn-tsè ê kong-bûn tang-tiong, uân-tsuân bô guān-ì sîng-jīn, jî-tshiánn kī-tsua̍t thiah-tû, tiong-iong kok pōo-huē hōo that phî-kiû, kè-sio̍k hòng-jīm Tâi-tang kuān-tsìng-hú niú-khiok huat-līng.”

Tsìng-tāi kong-kiōng hîng-tsìng hē hù-kàu-siū Tōo Bûn-lîng: “Lán ê hîng-tsìng ki-kuan kánn-ná sī piàn-tsò tsi̍t-tsiah thuat-kiong iá-bé, i m̄-bián tsiap-siū hîng-tsìng huat-īnn phuànn-kuat ê iok-sok, tī tsit khuán khuân-phîng bô-hāu ê tsōng-hóng tsi hā, koh it-ti̍t teh kah hîng-tsìng huat-īnn ê phuànn-kuat khòng-tsing.”

Tiunn Hiân: “Bí-lē-uan tsit ê pn̄g-tiàm ê khai-huat-àn sī sóo-ū Tâi-uân kok-tē ê BOT lóng ū khó-lîng ē bīn-tuì ê tsi̍t ê būn-tê, tō sī tsìng-hú bô pá-kuan.”

2012 nî 12 gue̍h 22, Tâi-tang-kuān tiàu-khui tē-tshit pái khuân-phîng, beh hōo Bí-lē-uan póo khuân-phîng, tsiū-tē ha̍p-huat, khuân-pó jîn-sū sī hui-siông ê put-buán.

Tē-kiû kong-bîn ki-kim-huē tsip-hîng-tiúnn Lí Kin-tsìng: “Kok-uī siūnn-khuànn-māi khuân-phîng-huat thong-kuè ê sî-tsūn, tē-it tiâu tō siá kóng uī-tio̍h ài ī-hông kah kiám-khin tuì khuân-kíng ê íng-hióng, tsi̍t ê kiàn-bu̍t lóng í-king khí-hó ah, koh beh tsò khuân-phîng, tse ná ū lâi ī-hông kah kiám-khin leh?”

Tsi-tshî Bí-lē-uan bîn-tsiòng: “Tâi-tang ài tsìn-pōo! tsi-tshî Bí-lē-uan!”

Tsi-tshî Bí-lē-uan ê tsāi-tē bîn-tsiòng kánn-ná sī tsiong tse khuân-kíng phîng-kóo huē-gī tòng-tsuè tsiū-gia̍p ki-huē phîng-kóo huē-gī, in jīn-uî kóng, guā-tē-lâng bô-ing-kai tshap-tshiú Tâi-tang ê huat-tián, hi-bāng Bí-lē-uan BOT ê sîng-kong àn-lē ē-tàng hōo koh-khah tsē ê tsâi-thuân tńg--lâi tâu-tsu Tâi-tang, tshuā-khí Tâi-tang ê kuan-kong huat-tián, hōo Tâi-tang ê tsú-tē ū ki-huē lâu tī kòo-hiong tsia̍h-thâu-lōo.

Tsāi-tē bîn-tsiòng Tshuà Bûn-sìng: “Guá tong-jiân ē su-liām guá ê gín-á, hi-bāng tī Tâi-tang tsia kang-tsok tō hó ah.”

King-kuè siang-hong thó-lūn liáu-āu, khuân-phîng tsú-si̍k N̂g Bîng-un tshuā-tio̍h 8 miâ uí-uân kàu jī-lâu khui bi̍t-sik huē-gī, m̄-nā bô hōo bîn-tsiòng lâi kàm-tok, liân muî-thé lóng hōo tòng tī-leh mn̂g-guā.

Kì-tsiá: “Lín kíng-tshat i-huat hîng-tsìng, lí tsit-má tòng guán tsuân-pōo kì-tsiá, hîng guá sin-bûn tsū-iû, hîng guá sin-bûn tsū-iû.”

Kuí hun-tsing liáu-āu, khuân-phîng uí-uân kong-pòo tsuè-āu ê kuat-tīng tō sī “ū tiâu-kiānn thong-kuè” Bí-lē-uan khai-huat-àn, iáu-m̄-koh kàm-tok ki-tsè kah lí-hîng sîng-lo̍k sū-hāng suah sī tsi̍t-phìnn khàng-pe̍h.

Lu̍t-su Khóo Ka-iông: “Tsit sann uī ing-kai ài huê-phiah, ing huê-phiah jî bī huê-phiah, guán jīn-uî kóng thîng-sū sī uân-tsuân uî-huat ê.”

Bí-lē-uan sui-jiân tī hun-hun-jiáu-jiáu ê khuân-phîng huē-gī tiong ū tiâu-kiānn thong-kuè khai-huat, iáu-m̄-koh khuân-pó thuân-thé piáu-sī, in suà--lo̍h-khì koh ē ū kî-thann ê hîng-tōng, tsua̍t-tuì sī bô beh kah Bí-lē-uan lâi thò-hia̍p.