[台語版]台文繪本創作 師大學生拼突破

2015年ê上尾第二工，台北市大安區ê龍安國小附設幼兒園，傳出台語ê讀冊聲。師大台灣語文學系三年kap四年ê同學，創作一系列ê台語畫本，來幼兒園講故事hōo囡仔聽。課程計劃ê指導教授林巾力、許慧如表示，這是頭一擺進行這款課程活動，目標是beh破除台語ê刻板印象，hōo學生那做那學，mā透過畫本創作，去幼兒園講故事ê方式，進入社區kap在地互動，推廣台語文應用。

龍安國小附設幼兒園tī師大附近，幼兒園姜慧娟主任除了肯定師大同學表現以外，mā認為用華台透lām ê方式對囡仔來講是真好ê教學方法。雖然幼齡學童對台語ê認知有限，但是經過師大哥哥姊姊的引tshuā，mā lóng 聽甲耳仔phak-phak-phak，mā有學童分享用台語講故事，聽起來比華語khah溫柔。

過去台語畫本創作大部份是改編民間故事，但是師大學生的作品， lóng是新ê故事題材。活動hit工，師大學生mā是功夫盡展，運用道具kap配樂來吸引囡仔ê注意，表現練習成果。

台語創作雖然是用親近ê台灣母語來創作，毋過因為社會環境kap風氣，kap過去無仝，面對強勢華語ê挑戰，uân-nā是真艱苦做ê khang-khuè，mā拄著真歹推廣ê問題。師大台文系ê教育團隊認為，台文教育應該自細漢開始，行出校園，進入社區，透過畫本創作、朗讀ê方式，深耕台語文化領域。

公民記者 張耕與 採訪報導。

感謝 許慧如 林巾力 老師指導

        陳柏成 高立 黃釋彰同學 攝影

        台語實作課 全體同學ê熱情演出

        龍安附幼老師學童ê投入佮相助