台語路成就更多美好的事，台語路上有你真好

用台語互動、用台語開講，這寡平常時加加干焦會當佇菜市仔聽著、看著的現象和聲音，今仔日佇台北松山文創園區有一大陣人，毋管是查埔查某老人抑是囡仔攏用台語來交流。佇這馬台灣華語較強勢的環境，會曉講台語的人口愈來愈少，毋過猶有一陣人平常時仔欲顧家庭閣有工課，猶原繼續推捒台語，干焦向望台語會當傳承落去，in是台灣台語路協會。

志工/陳品芳：佇咧教台語毋過是代課爾，就佇咧做台語的代課老師，其實是三年進前開始共台語揣轉來，想欲共阮兜的囡仔，我有一个孫仔阮小弟的查某囝共伊講台語。

台灣台語路協會佇2022年成立，提供閣較多元的台語體驗活動，發揚本土語言意識，嘛佇台語親子教育的領域拍拚，予台語路會當成就閣較濟美好的代誌。

這馬的囡仔攏是用華語講話為主，平常時佇厝內，家長嘛罕咧用台語和家己的囡仔溝通，台語是漸漸咧消失，總是，嘛是有家長發現這个問題，毋但開始做伙佮囡仔接觸台語，嘛予家己一个機會共台語揣轉來。

家長：講台語較濟，差不多有八、九成是講台語，因為我自細漢就是按呢講矣。

家長：會當加伊來參加台語的活動。

用台語講故事、耍遊戲，無論是大人抑是囡仔用一顆歡喜學習台語的心，共講母語的熱情揣轉來。

志工/陳品芳：咱若這緣的無佇咧講台語，伊就會斷去。

台語的傳承愛靠逐家拍拚，希望逐家攏會當開喙講台語，體會台語和台灣文化的連結，欣賞台語的媠。

公民記者呂頡盺 台北報導