【客華雙字幕/ 客語旁白】
富岡舊名伯公岡
伯公係客家人對土地公个稱呼
伯公岡个意思就係有伯公个細台地
這座伯公岡最早个福德祠
在地人安到老伯公
係西元1929年
摎伯公岡火車頭共年起个
到這下將近有百年个歷史
福德祠後牆走出拜亭外
並在原廟身外背加起屋頂摎面牆
變成盡特別个廟中廟
因為當偎兼火車頭个鐵支路
早期富岡街路民眾做得擐等三牲供品
直接穿過火車頭來這拜伯公
包尾因鐵路電氣化後个安全考量
就無開放
故所來這參拜个人斯緊來緊少
這站仔在一位熱血國小教師个帶動下
為老伯公注落了新个活水
在劉老師摎地方文史工作者个打拚下
桃園市古蹟歷史建築審查會
日前也決議通過
會繼續列冊追蹤富岡最早个福德祠
今年九月受到桃園文化基金會个邀請
第一擺參與桃園土地公民俗藝術節
用客語唸讀疏文
恭請老伯公神入香火座
鳴炮三響後
恭迎起駕入桃園城
活動現場在桃園新永和市場
眾多伯公登壇
就像係專門為伯公辦一年一度个同學會
伯公摎客家人个生活
有當深密个關係
行過百年風華个富岡老伯公
會繼續保佑地方
百業昌盛
合境平安
PeoPo 討論區
回應文章建議規則：