(望安母語版)澎湖在地母語實作計畫 望安國小生體驗傳統魚灶

 (中文版)：https://www.peopo.org/news/655037

       以早，熟魚灶佇澎湖是一項重要的漁產加工產業；這馬，煠魚免用魚灶，伊轉做傳承澎湖漁業文化歷史的教室。島嶼情結文化工作室，佇望安花宅辦理社區母語的實作計畫，共煠熟魚的過程照起工來做，用在地的語言分享故事，閣用抽選字卡的趣味方式予囡仔若耍若學家鄉的語言，予望安國小的學生囡仔了解望安過去重要的一段漁業歷史。

        佇澎湖望安花宅的曾家魚灶，有佮澎湖其他的魚灶無仝的形式—一支煙筒配四个灶空，透過親身體驗著魚灶煠魚的過程，予囡仔會當閣較熟識魚灶的空間佮工具的使用。

訪問：島嶼情結工作室 曾依苓(阮大伯公的魚灶自伊停業了後就一直崩歹到這馬，佇伊修復了後就開始會當有一寡教育體驗的活動佇遐咧舉辦，這擺會當重新用母語的方式來設計一寡趣味的活動來予囡仔會當體驗佮學習，感覺這是魚灶未來會當繼續閣發展的一个方向。)

        除了煠魚，學生嘛體驗曝魚的過程。囡仔有食閣有掠，閣會當提倒厝佮厝內的人分享。透過魚灶進行食魚教育，閣會當了解過去的歷史，學生囡仔嘛閣較了解家己家鄉的故事。

訪問：望安國小老師 徐和義(這擺的活動非常好，因爲學生會當透過這擺的活動熟識一寡傳統的物件用古早的網垵方言欲怎樣講，怹嘛會當學習母語，第二點，閣會當佮學校的食魚教育結合，共食魚教育深化，閣來就是學生參加這个活動會當親身動手操作，閣會當食著現煠現曝的魚脯，阮會當位囡仔的表情當中看會出逐家攏足歡喜來參加這个活動，所以按呢的活動誠讚，阮嘛希望將來有機會會當辦理閣較濟無仝的活動予學生參與。)

       認捌家鄉本土的語言閣有傳統魚灶產業的特色，有誠深的教育意義，欲怎樣加深囡仔對家己母語的印象，共文化傳予後一代？是澎湖其中一項誠重要的代誌。

記者/吳怡君、曾依苓、陳蔚慈 採訪報導